Mae menter yr heddlu yn darparu cefnogaeth ychwanegol i ddioddefwyr trais domestig

Mae swyddogion yn Abertawe a Chastell-nedd Port Talbot wrthi'n ymwneud â menter beilot newydd sy'n gweithio i sicrhau diogelwch dioddefwyr troseddwyr y rhoddwyd Gorchmynion Atal Trais Domestig (DVPOs) iddynt gan y llysoedd.

Mae swyddogion yn ymweld â dioddefwyr ac yn cynnal patrolau wedi'u targedu i sefydlu a yw telerau'r DVPO wedi'u torri.

Ers cychwyn y cynllun peilot ar 1 Mehefin, mae swyddogion wedi ymweld â dioddefwyr sy'n cael eu hamddiffyn gan y gorchmynion hyn dros 50 o weithiau, gan arwain at nifer o ddioddefwyr yn dod o hyd i'r hyder i ddarparu datganiadau mewn perthynas â'u hachosion a phump o arestiadau am dorri rheolau gan droseddwyr.

Dywedodd yr Arolygydd Carys Thomas:

“Mae’r troseddwyr hyn wedi cyflawni rhai o’r troseddau trais domestig mwyaf erchyll rydyn ni wedi’u gweld yn ardaloedd Abertawe a Chastell-nedd Port Talbot, a byddwn ni’n gwneud popeth o fewn ein gallu i gadw ein dioddefwyr yn ddiogel rhag y troseddwyr hyn, gan eu helpu i dorri’n rhydd o’u cam-drin ac o’r diwedd symud ymlaen â’u bywydau.”

Dywedodd y Prif Uwcharolygydd Stephen Jones, Comander yr Uned Rheoli Sylfaenol:

“Ni ddylai neb deimlo’n anniogel yn eu cartref eu hunain. Dim ond lle mae tystiolaeth glir o ymddygiad treisgar a chamdriniol y cyhoeddir y gorchmynion hyn ac mae’n gwbl gywir a phriodol ein bod yn cefnogi’r rhai sydd wedi bod yn ddigon dewr i ddod ymlaen gyda gorfodi cadarn. Byddwn yn mynd ar drywydd y troseddwyr hyn yn barhaus, ac rydym eisoes wedi gweld dedfryd o 28 diwrnod yn y carchar yn cael ei gosod am dorri’r gorchymyn.

"Mae ein neges yn glir, mae trais yn y cartref yn gwbl annerbyniol. Plîs, dewch ymlaen os ydych chi neu rywun rydych chi'n gofalu amdano yn cael ei frifo, ei fygwth neu ei reoli. Byddwn yn gwrando arnoch chi, yn eich trin â pharch a byddwn yn eich cefnogi."

Ymddygiad rheoli, bwlio, bygythiol neu dreisgar yw cam-drin domestig. Mae'n digwydd rhwng pobl 16 oed a throsodd a'u partneriaid, cyn-bartneriaid neu aelodau o'r teulu. Yn aml, gall hyn fod yn batrwm o gam-drin, ond dim ond unwaith y mae angen i'r cam-drin ddigwydd er mwyn i ni gymryd camau pendant. Gall ddigwydd i unrhyw un. Does dim ots beth yw eich ethnigrwydd, rhyw, rhywioldeb na chefndir cymdeithasol.

Gall cam-drin domestig gymryd sawl ffurf. Nid yw bob amser yn cynnwys trais corfforol.

Os nad yw rhywbeth yn teimlo'n iawn, gallwch ei riportio.

Os nad ydych chi'n barod i siarad â'r heddlu, gallwch gysylltu â sefydliadau cymorth a fydd yn eich helpu, drwy ymweld â'n tudalen sefydliadau cymorth .

Os oes gennych bryder am ffrind neu aelod o'r teulu, gallwch roi gwybod i ni drwy 101 neu ffonio Crimestoppers yn ddienw ar 0800 555111. Ffoniwch 999 bob amser mewn argyfwng.